Членство во задолжителните приватни пензиски фондови
Кои се измените на пензискиот систем?
Во едностолбниот пензиски систем, работодавецот уплаќа придонеси за пензиско и инвалидско осигурување за секој работник во Управата за јавни приходи (УЈП) и потоа тие се пренесуваат во Фондот за пензиското и инвалидското осигурување на Македонија (Фондот на ПИОМ). Во реформираниот систем се плаќа иста вкупна стапка на придонес и за осигурениците кои припаѓаат само на првиот столб и за членовите на двостолбниот пензиски систем . Новина е тоа што има приватни задолжителни пензиски фондови за чии членови пензиското и инвалидското осигурување се обезбедува едновремено од страна на Фондот на ПИОМ и од страна на избраниот задолжителен пензиски фонд. Ова го претставува двостолбниот пензиски систем. Вкупната стапка на придонес се дели на два дела и тоа: 65% се задржува во Фондот на ПИОМ, додека 35% се префрлаат на индивидуална сметка во избраниот задолжителен пензиски фонд. Придонесот префрлен на индивидуалната сметка се акумулира и се оплодува се до остварувањето право на пензија.
Сите лица што се вработиле по прв пат по 1 јануари 2003 година задолжително преминуваат во двостолбниот систем. Оние што се вработиле пред овој датум имаа можност да изб ерат дали да се приклучат на двостолбниот систем или да останат во едностолбниот систем.
За оние осигуреници што останаа во едностолбниот пензиски систем, пензијата ќе се исплаќа единствено од страна на Фондот на ПИОМ и за нив нема да има измени во начинот на кој ќе го стекнуваат правото на својата пензија. Оние лица пак што се приклучија или ќе се приклучат кон двостолбниот пензиски систем и се зачленија или ќе се зачленат во еден од задолжителните пензиски фондови, ќе примаат комбинирана старосна пензија од Фондот на ПИОМ и од средствата на задолжителниот пензиски фонд акумулирани на нивната индивидуална сметка во задолжителниот пензиски фонд во моментот на пензионирање. Фондот на ПИОМ ќе продолжи да ги исплаќа инвалидската, семејната пензија и гарантираната минимална пензија за осигуреникот без разлика во кој систем членува осигуреникот.
Задолжително и доброволно членство во ЗАДОЛЖИТЕЛНИТЕ приватни пензиски фондови
|
Категории членови |
Период на избор |
|
Доброволни членови |
|
Вработени по прв пат пред 1 јануари 2003, а кои не биле во работен однос во периодот на зачленување (20.09.2005-31.12.2005г) |
Три месеци од датумот на повторното вработување. |
|
Задолжителни членови |
|
Вработени по прв пат по 1 јануари 2003 година |
Три месеци од датумот на прво вработување. |
Секој вработен има право на личен избор со кое пензиско друштво ќе склучи договор за членство во задолжителен пензиски фонд. За да донесете вистинска и сигурна одлука, МАПАС Ви препорачува:
- Користете го калкулаторот за проценка на пензијата
- Разговарајте со агенти на двете друштва пред да одлучите во кој фонд ќе се зачлените и при тоа побарајте ја легитимацијата на агентот со кој разговарате
- Доколку потпишете договор за членство во задолжителен пензиски фонд со што го официјализирате својот избор, имате право во рок од 8 дена да се предомислите и да го раскинете претходно потпишаниот договор.
Работодавецот нe смее да влијае врз своите вработени да се приклучат кон одреден задолжителен пензиски фонд и не смее да дозволи вршење на маркетинг на работното место на вработените, согласно Законот за задолжително капитално финансирано пензиско осигурување. Исто така работодавците, вработените, синдикалната организација или друго колективно тело не смеат да примаат подароци или други поволности заради зачленување во некој задолжителен пензиски фонд.
| 
english
